Margir kannast við blini með reyktum laxi og sýrðum rjóma. Okkur langaði að gefa ykkur uppskrift af annarri útgáfu af þessum þekkta rétti þar sem kartöflur eru notaðar í deigið. Í Skagafirði eru kartöflur ræktaðar á mörgum bæjum. Fyrir þá sem leggja ekki í að rækta sínar eigin þá er hægt að kaupa kartöflur frá Hofsstöðum í Skagafirði í mörgum verslunum. Þessi uppskrift er hægt að nota eins og forréttir fyrir fjóra eða skemmtilegan rétt í brunchinn.
Uppskrift:
4-5 meðalstórar soðnar kartöflur
2 laukar
2 egg
4 msk hveiti
1 tsk lyftiduft
Olía til steikingar
Dillkrem:
1 dós sýrður rjómi
1-2 tsk fínt saxað dill
1 tsk sítrónusafi
Salt og pipar
Reyktur lax
Kavíar, rauður eða svartur
1 msk fínt saxaður vorlaukur ofaná
Skrælið og maukið kartöflurnar og saxið laukinn fínt. Blandið þessu vel saman með eggjunum, hveitinu, salti, pipar og lyftidufti. Formið kökur úr ca. 2 msk af deigi á pönnunni og steikið þar til gyllt í olíunni á heitri pönnu. Gott er að gera ráð fyrir ca. 4 mín á hvorri hlið. Þetta ætti að verða að ca. 10-12 kartöflupönnukökum.
Dillkremið er búið til með því að hræra saman sýrðan rjóma, dill, sítrónusafa, salt og pipar.
Komið pönnukökunum fyrir á fallegu fati og raðið reykta laxinum á þær. Ofaná þetta fer svo kavíarinn og dillkremið. Puntið svo pönnukökurnar með vorlauknum og jafn vel nokkrum greinum af dilli. Í réttinn er einnig hægt að nota reyktan silung ef fólk vill það heldur.
